सिरहा । सिरहाको गोलबजार नगरपालिका ९ डण्डा टोलको इनारमा भेटिएको शव निकालिएको छ । प्रहरी र सेनाको टोलीले शनिबार बिहानदेखि इनारबाट शव निकाल्ने प्रयास गरेपनि नसकेपछि दिउँसो करिब सवा २ बजेतिर जनकपुरबाट आएको प्रहरी टोलीले शव निकालेको हो ।
इनारमा अक्सिजनको मात्रा कम भएकाले आफूहरुले नसकेपछि जनकपुरबाट मगाइएको टोलीले शव निकालेको इलाका प्रहरी कार्यालय गोलबजारका प्रहरी निरीक्षक राजु के.सी.ले बताए । प्रहरी निरीक्षक के.सी.का अनुसार घटनाबारे प्रारम्भिक अनुसन्धानसहित मुचल्का उठाएर शव पोष्टमार्टमका लागि लहान पठाइएको छ ।
स्थानीयका अनुसार इनारमा भेटिएको शव स्थानीय करिब ४५ वर्षीय रामजतन पासवानको हो । शुक्रबार साँझदेखि हराइरहेका पासवानको चप्पल र गञ्जी इनार नजिकै फेला परेको प्रहरीले जनाएको छ । प्रहरीका अनुसार घटना भवितव्य वा नियोजित के हो भन्ने बारेमा पोष्टमार्टम रिपोर्ट आएपछि मात्र यकिन हुनेछ ।